Bilitsit akunnittarfillu

Aqqutaa tamaat pisariitsumik toqqissinartumillu angalagit

Bilitsit angalanerlu

Nunarsuaq tamakkerlugu timmisartortitseqatigiit kattuffianni IATA-mi angalatitsisartutut nunarsuarmi timmisartortitseqatigiiffinnut tamangajannut bilitsiliorsinnaavugut. Tamanna nunani 90-it sinneqartuni nunarsuaq tamakkerlugu timmisartortitseqatigiiffinnut 400-inut, akunnittarfinnut 80.000-it sinneqartunut biilinillu attartortitsisarfinnut 30-it sinneqartunut periarfissaqarnitsinnik isumaqarpoq. Allatut oqaatigalugu tikikkusutannut apuutissaqaarpatsigit.

Ilinnut iluaqutitaa tassaavoq angallaviusinnaasunut, bilitsinut akinullu assigiinngitsunut illit nammineq internet aqqutigalugu pissarsiarisinnaasanniit amerlanerujussuarnut periarfissaqarnerput. Timmisartortitseqatigiit akornanni isumaqatigiissutit (timmisartortitseqatigiit akornanni pisattanik isumaginninnermut tunngatilugu maleruagassat) ilisimavagut taamaalillutillu pisattannik pisariaqanngitsumik tunniusseqataartariaqassanngilatit.

Akunnittarfik unnuinerlu

Nunatta Angalatitsiviani sumi najugaqarsinnaanerit sinilluarsinnaanerillu ilisimavarput, nunarsuarlu tamakkerlugu akunnittarfinnut 80.000-it sinneqartunut periarfissaqarluta.

Nunatsinni nunattalu avataani akunnittarfinnut akitigut pitsaasunik isumaqatigiissuteqarpugut. Sullitagut amerlasuut akunnittarfinnik aalajangersimasunik atuisuupput allalli angalanermiit angalanermut akunnittarfii nikerarput. Illit nammineq aalajangissavat taakkulu iliuuseqarfiginissaat sungiusimavagut. Angalasut ilisimaarilluarajuppagut kissaataallu ilisimareertarlugit.